Toxic Ruswil

Eusi hütig Destination heisst Ruswil, oder au Rusmu, wie die Iigeborene säged. Gastgeber sind d’Bielbachfäger und ihres Fescht „Toxic“ findet das Johr underem Motto „Fit a BARcours“ statt. Wer scho mol Sport gmacht het weiss, wie wenig dass es mängisch brucht, bis es Zwickt und und’s en Muskelkater git. Doch mir sind jo trainiert… Nochli Dehn- und Ufwärmüebige, während dem eus de René durs Seetal kurved und mir sind ready. In Rusmu acho, gohts ned lang bis die bereits awäsende Gäst merked, dass d’EBG acho isch… Zwoi Userwählti nänd zerscht emol de Apero in Augeschiin und prüefed ihri Träffsicherheit, während die andere die vermeintlich Bühni – was sich denn doch nur als drü ufnand gstapleti Festbänk usegstellt hät – amne sträng dokumäntierte Prüefverfahre underziehnd: Resultat: Ungenügend! Und denn cha de Fit a BARcours ändlich losgoh, schliesslich bechunnt jede BARcours-Absolvänt en Priis und mir währed ned d’EBG, wenn sich ned viel vo eus heimlich zum Ziel gmacht hätte, als ersts de BARcours z`meistere. So erstuunts au ned, dass bald nach eusem erschte churze Uftritt uf de Ussebühni tatsächlich 4 EBG-Mit- und Ohniglieder die Allererste gsi sind, wo d’Kontrollcharte voll gha und somit a jedere Bar en Drink bezoge händ! Mir sind also Fit für die bevorstehendi Fasnacht! Jetzt heissts aber zerscht mal nochli Fescht gnüüse, Guggene lose, Heubürzlis schloh, d’Ein-Mann-Band im Kaffizält nerve und und und denn euse Uftritt ide Halle isch erscht am zwölfi… Bevormer de spöter aber uf d’Bühni händ chönne, hämmer zerscht no müesse eusi Instrumänt uftaue… Festgfrohrni Ventil und chalti Chuchi! Ja es isch chalt in Rusmu! Doch ned nur was s’Wätter abelangt, nei au s’Publikum isch meh lauwarm statt heiss. „Applaus“? En Modetrend wo anschienend nonig bis is Luzerner Vorland gfunde het. Zur eusere Beruhigig händ’s bide andere Guggene ebefalls ned viel degliiche doh. Es liit also ned a eus. Phu! Nichts desto trotz, hets Spass gmacht, es isch wiedermal einisch meh en glungne Obe gsi, und er änded mitem historische Ereignis: Die wohl ruhigsti und lisligschdi Heifahrt sit Langem. Herzliche Dank de Bielbachfäger für euchi Iladig und bis zum nöchschte mol. /mida