Steil 2013

Mir hei es strängs Wuchenend hinger üs: am Friti si mer mit em Car uf Wigoltinge i Kanton Thuuurgaaau gfahre, am Samschti isch de dr René mit üs uf Untersiggethal kurvet.

Jetz aber dr Reihe noche: scho vor 2i Johr si mer am legendäre STEIL drbi gsi, dennzumau am Samschti Obe, das Johr jetz mit em ne Uftritt am Friti im Zäut. Nachere churzwilige Fahrt mit etleche Geburtstäg, Schmink-Aktione und Hiiwiise a es paar Mitglieder, wie si sich im Notfau (gäu, Alain) zverhaute hei oder ou Überlegige wär me ächt nach em letschte Obe in Wigoltinge wider atrifft (gäu, Mire) si mer a üsem Zieu acho. Also Usstige, Ahänger uslade, Instrumänte-Depot i Beschlag nä und überflüssigi Chleider abzieh. Denn hei mer ds  Feschtgländ genteret und scho die erschte nöie Merchandising-Brille vor EBG a Maa und Frou brocht (danke Vöne und Co!). Nach em ne chline offerierte Znacht hei mer üs de schliesslech mit Honig-Chrüter und süschtige feine Getränk ufe astehend Uftritt igstumme. Bedient im Kafizäut vo…Brüscht im Dirndl?! Item, Houptsach es gratis-Shötli…
Und scho hets gheisse ab uf  Büni! D’Première vo zwöi nöie Stück isch uf em Programm gstange, d’Nervosität dementsprechend bi einige hööch. Jetz hei mer chönne zeige, was mer am vergangene Sunnti a üsem Probe-Tag aues hei glehrt. Gmäss üsne Zuehörer/inne hei mer e aständige Uftritt mit chline Äxtras häregleit. Dr Remo und dr Bolliger hei sech im gägesitig-d-Trompete-drücke versuecht und ds Posune-Register het eine vo de praktische Rhythmus-Ungerbrüch für ne Shötli-Rundi gnützt… So isch die Haubstung schnäu ume gsi und mir hei üs gschlosse id Party gstürzt und üsi Hangover-Choreographie güebt. D’Zit bis am 2i isch mit viu tollem Gugge-Sound uf jede Fau im Nu verbi gange und mir hei üsi Rückreis aträtte. Danke STEIL, danke Rüsselgugge für d Gastfründschaft, bis es angers mau! /manu