Holdrio XIII

Tag zwoi vo üsem Doppelwocheänd!
Die dunkle Augering und Farbreste hinder de Ohre sind gekonnt überschminkt und d’Flachmänner sowie d‘Portemonnaies wieder ufgfüllt worde. Mir befindet eus ufem Wäg richtig Untersiggental as Holdrio vode Wasserschlossfäger. Hinderem Stüür, wie chönnts au andersch si? Eusi treui Seel, Supporter und Privat-Schofföör, de René!
Nach mindestens so viel Geburtstäg wie geschter plus enere prickelnde Champagner-Duschi und zum Fescht passende Shötlis sind mir wohlbehalte im Schlaraffeland – so s’Motto vom Holdrio 2013 – acho.
Nachdem de Ahänger parkiert und d’Itrittsbändeli verteilt sind, bliibt eus nur no e halb Stund bis mir eus wieder füre Uftritt besammle. Also no schnäll a die nöchschti Bar oder s’offerierte Znacht go hole. Dass es, wie bereits geschter, scho wieder Fleischchäs git, isch ned wiiter schlimm, Alternativene gits gnueg. Cervelats zum sälber bröötle, Zuckerwatte und Süessigkeite wo vom Himmel gheie… Schlaraffeland ebe!
Nur öpis stimmt eus nochli misstrouisch: Es het zwar scho rächt viel Lüüt, doch die meischte sind ide Halle. Mir spieled aber dusse… Naja, vielleicht chömeds jo no use und wenn ned, was sölls! Mir wännd jo sowieso wieder es neus Stück zum erschte mal vor Publikum spiele. Wer weiss, vielliecht gar ned so schlächt, wenn ned allzuviel zuelose. Doch chum uf de Bühni, stürmed d’Schlösslischränzer vo Aesch (womer jetzt innerhalb vo knapp zwoi Mönet zum vierte mal aträffed) und d’S hoch 3 vo Heitersheim (ebefalls Altbekannti) de Platz unmittelbar vor de Bühni und füüred eus ah, als gäbs kei Morge meh! Sensationell! No sälte het en Uftritt so Spass gmacht. Nach knapp 30 Minute und de 2 oder 3 Zuegab händs eus denn doch no ab de Bühni gloh und mir händ eus ändlich nochli chöne em Fescht wittme. Übrigens: Die neue Lieder chömed guet, de Probeufwand het sich also glohnt.
Und plötzlich isch wieder zwoi! De René wartet und mir mached eus mit drü 2-Meter höche Zuckerstangene bewaffnet ufe Heiwäg. Doch in Speuz acho gönd nur die wenigschte würklich hei, alli andere gönd id Lion’s Bar, wos no ordeli Lüüt het! Ganz nachem Motto 1, 2 Schlummerbächer hämmer no immer gno, häts wohl de einti oder anderi geh, wo bereits bi Tageslicht het chöne Hei tschalpe. Alles in Allem also e glungni Nacht!

Herzliche Dank ad Wasserschlossfäger Untersiggental für de tolli Alass.
Mir händ es asträngends aber tolls Wocheänd hinder eus und freued eus uf nöchscht Samschtig, wo mir d’Chaos Gala vode Notäwürger Seewen wärde unsicher mache. Bis bald…
/mida