Fasnacht Wasen i.E./BE

A dem Samstig isch die ganztägig Fasnacht in Wasen uf em Programm gstande. Mer händ i dem Johr scho de eint oder ander Uftritt gha, was sich auf uf d’Mitglieder und dere Gsundheit usgwörkt hät. Also sind mer um die 11.00 Uhr am Morge Richtig Emmital, zu de Högerschnooger ufbroche. Euses stark dezimierte Grüppli, au bekannt als die „Glorrichen 16“ oder KF-EBT „Kleinformation – Erzbachtal“ isch so gege 13.00 Uhr dänn au in Wasen acho. Zur Begrüessig häts dänn en Apero in Form vo Käseplättli ond Fleischplättli geh, derzue ein erstundlich guete „Wisswy“. Orangesaft hät’s glaub au no geh…
Nachdem sich die Glorriche 16 gstärkt händ, hät am 14.14 Uhr de Umzog gstartet. Bi erstem liechte Schneetriebe isches dänn richtig Zelt losgange. Nach knapp 2 – 3 Stöck isch dänn au scho fertig gsi mit Umzog ond mer händ eus uf de Bühni vor em Zelt use ufgstellt. Nach em Monsterkonzert wo all awesende Guggene mit Usnahm vo eus, eis gspielt händ isch de Marc, de Präsi vo de Hogerschnooger zu mir cho ond hät no chli öpis is Mikrophone welle gseit ha. Naja han eus kurz vorgstellt ond gseit, dass es eus freut bi so schönem Wetter dörfe bi ihne z spiele… Glaub das isch ned so guet acho bi de Frau Holle… mer händ mit eusem erst vo 3 Platzkonzert agfange ond scho hät Sie afange d’Decki schüttle. Nach em 2te Stöck hät mer de Lee scho fascht nöme gseh, so viel Schneeflocke wo’s do umegwirblet hät. Nach em Konzert händ mer eusi Instrument in Ahänger brocht ond händ eus es Beizli zum Ufwärme gsuecht. Eusi Kostüm händ doch i dene 15min spielte 10-20cm Neuschnee müesse erträge… Ok, ok es sind nume 2-3cm Schnee gsi wo ich nach em Uftritt vo de Schultere han müesse klopfe, aber isch trotzdem kalt ond nass gsi. Einigi Gäst hand die Kälti mit viel Aklohol afange bekämpfe. De Bruno isch mit guetem Biespiel vora (nei, ned de TBS-Bruno).
Im Rössli händ mer dänn au en gmüetliche Ecke gfunde wo mer eus händ chöne ufwärme, de Mario hät en Kran gfunde zum spiele ond d’Vöne (wie chönts au enderst si) hät sich wieder mol en Orgelifründ gsuecht. Sie hät verhalte es paar ersti Lockrüef mit emene Handörgeli vo sich geh…… Nachemene Zitli isch dänn de Maestro cho und hät ihre es „richtigs“ Örgeli welle geh… Naja es isch dänn schlussendlich druf usegloffe dass mer gsunge händ und de Herr Kapellmeister mit sim Örgeli für gueti Stimmig gsorgt hät. Dank em Kaffischnapps sind dänn au scho die erste Idee in Ruum gstellt worde, dass mer au als Chor chöntet uftrette.
Bald drufabe händ mer eus richtig Schuelhüssli ufgmacht um euses Nachtesse z’fasse. Ond luege a, d Sonne schient wieder. S’Nachtesse isch ned ganz so en Sonneschien gsi… aber es isch immer hin kei Fleischkäse gsi!
Euse 2ti Uftitt uf de glieche Usebühni hät bi trockenem Wetter statt gfunde, isch zwar fangs richtig kalt worde aber es hät immer hin ned gschneit. I de Shotbar hät mer dänn au de trinkfreudig Bruno wieder gfunde. Er hät i de Zwöscheziit scho 2mol s Käferli gmacht ond hät vo zwei ortskundige Fasnächtler müesse heibrocht werde.
Es isch mittlerwille 20.00 Uhr worde ond immer noch kalt ond nass, de Schnee hät bereits afange asetze ond es isch alles wiss worde…
Am 21.30 händ mer dänn ause Letzti Uftritt vo dem Tag gha, natürlioch wieder uf dere Usebühne. Mer händ eus dänn aber dezue entschiede mit eusen 16 Lüt lieber is Zelt inne z stoh ond händ dört nomol versuecht z spiele. Es isch jo au scho en lange Tag gsi ond de Kaffi isch hald au cheibe guet gsi… ond mer sind au gar ned viel gsi! Ok mer händ au nöm so recht möge ond sind froh gsi wo de Uftritt dänn au dure gsi isch.
De Röné, euse Carpilot isch eus dänn au bald choge abhole. Er hät eus trotz übelstem Schneetriebe sicher zrug uf Speuz brocht. Es herzlichs dankeschön an alli vo de legen……däre „Glorreichen 16“ /waldy