Chaos Gala

De Samstigobe isch ganz unterem Motto Chaos gstande. Jo schliesslich simmer ade Chaos Gala in Ibach (SZ) gsi. Aso eigentlich het s’Motto am Fäscht vode Notäwürger Seewen jo „Space Trip“ gheisse, aber mit Chaos het d’EBG halt doch chli meh am Huet als mit Usserirdische und Ufos.
Üse lieblings Car-Chauffeur, de René, het üs dor Schnee und Iis guet as Fäscht brocht. Wienerli mit Brot und dezue es Kafi-Honigchrüüter händ üs för die erste Stunde gstärkt. Am 11i denn üse Uftritt.
D’Organisatore händ d’Guggene abwächsligswiis dinne und dosse lo spiele lo. Ond mer händ s’Vergnüege verosse gha. Jo, mer hättet vel för en Heizpilz uf de Bühni geh i dem Momänt. Aber de heissi Guggesound het di chalte Finger und Füess au ufgwärmt. Mit üsere Fanformation, de TBS, hämmer e guete Uftritt a Tag gleit. Nochäne simmer aber doch froh gsi wos wieder es Kafi-Honigchrüüter geh het.
Drom schnell go ufwärme ide grosse drüfach-Tornhalle oder im Kafizält… denn aber bald weder veruse go d’Hübelschränzer Dottikon bejuble. Au sie händ s’allerbeste gmacht us dere chalte Nacht. Heissi Guggene mached halt au heissi Stimmig!
Es letschts Abschloss-Tänzli vom Robin und bald isches zwoi gsi und mer händ üsi Heifahrt müesse aträtte. Uf dere hets denn no eis, zwoi Zwüschefäll geh, wo mer aber ned zwingend müend erwähne… Hauptsach mer sind denn am halbi 4i – di einte meh, di andere weniger – weder guet usgnüechteret in Speuz acho! /mire